Rosman Jo Rosmani


Judul Lagu : Rosman Jo Rosmani
Ciptaan : Nedi Gampo

Tibo maso nyo si Rosman jo Rosmani
Maikek cinto kasiah sayang nan suci
Niaik nan baiak nak manuju palaminan
Batamu rueh jo buku sajuak paratian

Ka urang tuo mukasuik di sampaikan
Amak jo ayah maangguak maiyokan
Mamak Rosmani lah datang maminang si Rosman
Jawek lah jawek Niniak Mamak bapasambahan

Iyo... singkek kato singkek carito
Rundiang putuih kato saiyo
Di buek alek bulan di muko
Alek gadang di kampuang nan ko

Iyo... abih hari baganti hari
Lah tibo hari nan di nanti
Si Rosman jo si Rosmani
Ka ijab kabul lah nyo lai

Alah di liek hari nan baiak, alah di cari kutiko nan elok, bajanji di bulan timbuah hari Jumat ai katiko itu, antaro pukua sambilan pagi. Matohari baranjak naiak, barambuih angin sasayuik sampai tuan ai. Lah rasah urang dek manunggu, iyo di rumah ayah Rosmani, lah panjang lihia dek mancaliak, mananti calon marapulai tuan ai.

Dak lamo antaro nyo lah tibo malah rombongan si Rosman, rami dek rantau urang nan banyak, indak katinggalan ayah jo amak, sarato handai toulan jo dunsanak. Lakek kupiah di kapalo si Rosman sarato jas barono hitam, antah di bali antah di salang atau nyo rental jo setek nan punyo palaminan ndeh kanduang ai. Bakato malah Mamak Rosmani, usah lamo tagak di laman, lamo tagak kok jadi paniang, muoh lah naiak ka ateh rumah. Dalam lah mananti upiak Rosmani, babaju kuruang balangan panjang, iyo barono sirah jambu, barendo rendo di langan nyo, sarato salendang panutuik kapalo. O... dek nan dari kain songket nan di sulan di Pandai Sikek, sabana kamek Rosmani katiko itu, muko babadak bibia bagencu mato bacalak bainai di kuku, yo manunduak malu malu ndeh tuan ei.

Lah lamo lambek antaro nyo, datang sarobongan apak nan gagah, datang jo oto merek avanza, di rental dek si Rosman sajak hari Salasa, rupo nyo panghulu dari KUA, kan manikahkah si Rosman jo Rosmani mandeh oi. Kok di rantang namuah nyo panjang, elok di gumpa nak nyo singkek, lah naiak panghulu ka Rumah Gadang, duduak di muko yo palaminan, di sinan ijab kabul ka dibacokan tuan oi. Duduak pulo urang nan banyak, tamasuak si Rosman jo si Rosmani, duduak barami basasak sasak, nak mancaliak panikahan nan suci. Di imbau dek panghulu ayah Rosmani, nan banamo Syaiful Ramli, baliau malah nan ka jadi wali, kan jadi wali upiak Rosmani tuan oi. Di mintak pulo tamu nan datang, di mintak untuak ka jadi saksi, saksi sabanyak ampek urang, baitu caro nyo dalam agamo. 

Lah cukuik syaraik kasadonyo, di sinan bakato apak panghulu, maagiah ceramah ka calon pengantin, singkek dan padek yo ceramah nyo tuan oi. Nan paliang pokok kato baliau "kalau hiduik nak balaki bini, harus cinto mancintoi, harus sayang manyayangi, saliang harago maharagoi, saliang hormat menghormati", nan pontiang bana nak oi "sinarilah rumah tangga dengan sholat, supayo kito jadi salamaik, baiak dunia ataupun akhiraik, supayo jadi kaluarga nan Sakinah Mawadah dan Warohmah". Lah di agiah arahan ka calon pengantin, lah di agiah arahan ka ayah Rosmani, nan batindak sebagai wali, ijab kabul di mulai lai. Alah di ganggam tangan si Rosman, iyo di ganggam ayah Rosmani, dan di mulai dengan basmallah, bakato baliau maso itu "Wahai Rosman, aku nikahkan engkau dengan anakku Rosmani binti Syaiful Ramli dengan mahar seperangkat alat sholat tunai", langsung di jawek malah dek Rosman "Aku terima menikahi Rosmani binti Syaiful Ramli dengan mahar seperangkat alat sholat tunai".

Alah salasai ijab jo kabul, batanyo Penghulu ka bakeh saksi, langsung di jawab malah dek saksi "Sah" kecek saksi. Mako resmi lah si Rosman jo Rosmani, iyo sebagai suami istri, ndak tabado pak gadang nyo hati, baiak si Rosman atau si rosmani tuan oi. Baurai aia mato Rosmani, bapaluak Rosmani nan jo ayah nyo, saliang paluak bapaluakkan, saliang tangih batangihan, tangih bahagia kato rang kini. Sambia manangih ayah bakato "Daun sicerek denai gadangkan, lah gadang di cabuik urang, sajak ketek nak anak di gadangkan, lah gadang di ambiak urang. Pandai pandai manjago diri nak, hormati lah suami anak, jan durhako ka bakeh laki, jan mandaceh di suruah laki, karano ridho Allah talatak di ridho nyo suami". Yo...

Singkek carito ijab kabul lah salasai
Hari minggu tibo baralek malah nyo lai
Duduak basandiang Anak Daro jo Marapulai
Urang mancaliak bagalak badarai darai

Bapak jo ibu sarato sanak sudaro
Dangakan kami banyanyi apo ado nyo
Jikok baralek jan samapai babuek doso
Jan karajoan nan di larang dek agamo

Iyo... ingin mariah perkawinan
Buliah sajo pakai hiburan
Pakai saluang atau orgen tunggal
Barabab atau kasidahan

Iyo... hanyo sabuah pasan kami
Pernikahan nan sangaik suci
Usah lah di nodai
Jo mabuak mabuak sampai pagi

(Minum tuak sarato wisky
Pakai narkoba nan jo ekstasi
Bataruah bamain judi
Main koa atau main remi

Hei... ado pulo nan manyadiahkan
Baorgen tunggal bakalabiahan
Sampai azan subuah lah tingaran
Nan orgen tunggal taruaih bajalan
Jo musik batantang bagalagaran
Musik triping jo penyanyi nan indak sopan

Sipatu satinggi lutuik
Rok sajari tangan
Katiak bakirai
Pusek basingkokan
Maonjak onjak bantuak labu di banam ndeh tuai oi

Nan niniak mamak mungkin ndak tau
Atau icak icak indak tau
Nyo biakan sajo karajo nan taka itu
Ka jadi a... lai tu...
loading...

Informasi lain yang kami bagikan :

0 komentar: